Archive for category: Fréttir

Fréttabréf Félags eldri borgara í Hveragerði í janúar 2023

Kæru félagar. Gleðilegt nýtt ár og bestu þakkir fyrir hið liðna. Við hvetjum ykkur til að taka þátt í hollri hreyfingu og margs konar góðri iðju í félaginu okkar. Meðfylgjandi er stundatafla vormisseris sem í þetta sinn skiptist í tvö 10 vikna tímabil. Mánudaginn 23. janúar hefjast fyrstu námskeiðin og stendur það tímabil fram að páskum. Eftir páska hefst nýtt tímabil, einnig 10 vikur, sem stendur fram í fyrstu viku júni. Hægt er að velja bæði tímabilin, þ.e. 20 vikur, eða kannski aðeins fyrir páska eða eftir páska, 10 vikur hvort tímabil.

Nú verða í boði tvö ný námskeið í Þorlákssetri: Námskeiðið „Að lesa ljóð og yrkja ljóð“ er byggt upp á einföldum skrifæfingum sem ganga út á að láta þátttakendur líkja eftir góðri fyrirmynd og vinna síðan áfram með eigin texta. Þátttakendur fá að lesa upp það sem þeir skrifa eða fá aðra til þess. Einnig verður stefnt að upplestri eða ljóðasýningu í lokin. Þátttakendur eiga að hafa með sér penna/blýant og blöð til að skrifa á eða tölvu. Kennari er Anton Helgi Jónsson. Einnig námskeiðið; “Að hekla körfu” stutt námskeið þar sem þátttakendur læra að hekla stóra körfu í tveim litum að eigin vali, með heklunál nr. 5,5. Farið er yfir heklutáknin og uppskriftarlæsi og er allt garn innifalið í verðinu. Karfan er síðan tilvalin undir garn og annað handavinnudót eða bara hvað sem er. Kennari er Kristjana Björk.

Í haust buðum við upp á vatnsleikfimi í sundlaug Heilsustofnunar og var kennarinn Rakel. Þá komust ekki allir að, við gátum haft tvo hópa (40 manns) en hefðum viljað hafa einn hóp í viðbót. Nú höfum við fengið vilyrði fyrir þriðja hópnum ef þátttaka verður það mikil. Áfram verður boðið upp á Yoga og Yoga nidra í Kapellu Heilsustofnunar og Dansleikfimi í Skyrgerðinni. Síðast en ekki síst ber að geta um allt það frábæra starf sem fer fram í Þorlákssetri, sem allir geta tekið þátt í. Ljósmyndahópurinn sem starfaði líka í fyrra er það stór að ekki er hægt að bæta við þar en þá er alveg upplagt að mynda nýjan hóp, finna nýjan tíma og þeir reyndari hafa lofað að leiðbeina. Kórinn okkar Hverafuglar er á fljúgandi ferð og er meira að segja að fara í vorferð til Gdansk.

Við skráningu á námskeið þarf að skrá fullt nafn, kennitölu, hvaða námskeið, hvaða tímabil, fyrir eða eftir páska eða allar 20 vikurnar. Best og tryggast er að skrá sig með tölvupósti á netfangið torlaksetur@gmail.com. Einnig er hægt að skrá sig í síma 4835216 kl. 13-16; föstud. 13. 1., mánud. 16.1., þriðjud. 17.1. og miðvikud. 18.1.

Nú hefur verið ákveðið að niðurgreiðsla félagsins verði 25% og er búið að reikna þann afslátt inn í verðskána hér að neðan. Eins og áður koma þátttökugjöld fyrir námskeið í heimabankann skömmu eftir skráningu og er gott að ganga frá greiðslum sem fyrst eftir það.

Verðskrá fyrir námskeið á vorönn 2023
– Vatnsleikfimi – fyrir páska kr. 7.100
– Vatnsleikfimi – eftir páska kr. 5.400 (7 skipti vegna 3 frídaga á tímabilinu)
– Yoga kr. 7.700
– Yoga Nidra slökun kr. 7.700
– Dansleikfimi kr. 4.500
– Vatnslitanámskeið kr. 8.600
– Körfuhekl kr. 4.200
– Ritlist ljóða kr. 5.200

Við kynnum síðar margs konar viðburði s.s. leikhúsferðir, ferðalög, fræðsluerindi, skemmtanir og fleira sem er í undirbúningi. Þar eru hugmyndir ykkar afar vel þegnar. Ekki hika við að hringja eða senda tölvupóst ef spurningar eða hugmyndir vakna.

Fyrir hönd stjórnar
Sigurlín Sveinbjarnardóttir, starfandi formaður
Sími; 898 2488, netfang; sigurlinsv@simnet.is

Kæru vinir í Félagi eldri borgara í Hveragerði. Nú förum við að huga að því að taka hlé frá félagsstörfum fram yfir áramót og njótum tímans með ættingjum og vinum yfir hátíðarnar.

Það er gaman að rifja upp hvernig jólin voru í uppvexti okkar flestra þegar rafmagn var ekki komið á öll byggð ból og alls ekki jólaskreytingar eins og þær sem við sjáum nú prýða bæinn okkar. Ég var víst orðin 8 ára þegar rafmagnið kom nokkuð stöðugt í sveitina mína. Við vorum með þeim fyrstu til að hengja upp litaðar ljósaperur í eitt tréð í garðinum og vakti það mikla forvitni hjá nágrönnum. Kannski eigið þið svipaðar minningar frá bernskunni?

En hvað verður á döfinni á nýju ári í FEB Hveragerði. Hér nefni ég helstu atriði: Það verður sent út fréttabréf og ný stundatafla um 10. janúar 2023; í tölvupósti, á heimasíðu, í sms og með pósti. Skráning í námskeiðin verður 11., 12. og 13. janúar, bæði í síma og með tölvupósti. Starfsemi í Þorlákssetri sem ekki kostar getur byrjað eftir áramót þegar hópstjórar og félagar óska.

Aðalfundur verður haldinn 23.02.23. Þar verður kosið í nokkur embætti og verður það kynnt með lögboðnum fyrirvara. Áslaug Guðmundsdóttir, kosinn formaður, hefur tilkynnt á stjórnarfundi 9.12. sl. að hún vilji ekki vera áfram.

Við í stjórninni sendum ykkur hlýjar jóla- og nýárskveðjur með kæru þakklæti fyrir það liðna. Við hlökkum til að hitta ykkur eftir áramót.

Sigurlín, starfandi formaður.

Kæru félagar
Félag eldri borgara í Hveragerði býður upp á fræðslukvöld í Þorlákssetri
föstudaginn 18. nóv. kl 19:30
Við höfum fengið til okkar Sigrúnu Huld Þorgrímsdóttur með
fræðslufyrirlesturinn „Þroskaverkefni ellinnar” en hann er klukkutíma langur um
þær áskoranir sem gjarnan fylgja hækkandi aldri, einkum á félagslegu og geðrænu
sviði.
Sigrún Huld Þorgrímsdóttir er hjúkrunarfræðingur að mennt og hefur starfað við
hjúkrun lengst af starfsævinni. Hún hefur starfað á öldrunarsviði frá því um
aldamót og jafnframt sótt framhaldsnám í öldrun við hjúkrunarfræðideild Háskóla
Íslands þaðan sem hún lauk meistaraprófi árið 2008. Hún hefur sérfræðileyfi í
öldrunarhjúkrun frá Embætti landlæknis.
Auk þess mun Sigrún Huld kynna bók sína „Ný menning í öldrunarþjónustu“ sem
út kom árið 2019.
Um bókina.
Viðhorf almennings til félagslegrar þjónustu hafa gjörbreyst síðustu áratugi. Fólk
hafnar stofnanaþjónustu og „pakkalausnum“ hins opinbera sem eru eins fyrir alla
og krefst einstaklingsmiðaðrar þjónustu í einni eða annarri mynd. Raddir okkar
dagar kalla á valfrelsi, sjálfræði og notendastýrða þjónustu.
Aldraðir víða um lönd taka í vaxandi mæli undir ný viðhorf og nýjar kröfur, að fá
að njóta valfrelsis og sjálfræðis þótt þeir þurfi á þjónustu og aðstoð að halda.
Lykillinn að lífsgleði er ekki síst sá að fá að lifa með reisn þar sem reynsla og
persónuleiki hvers og eins fær notið sín.
Í þessari bók er þróun öldrunarmála rakin og sagt frá margvíslegum skrefum til
framfara, m.a. á Norðurlöndum og í Bandaríkjunum. Lýst er kostum og göllum
nýrra aðferða og stefnumiða og loks sagt frá þróun öldrunarmála hér á landi og
hvaða valkosti megi telja vænlega í náinni framtíð.
Hjartanlega velkomin
Stjórnin

Heil og sæl
Við hittumst um daginn nokkrar konur sem hafa áhuga á að halda áfram með
leshópinn/bókmenntahópinn sem starfræktur var á vegum FEBH, en með örlítið breyttu formi. Við
viljum kanna hvort fleiri hafi áhuga.
Hugmynd okkar er að fundirnir verði frjálslegir og á hverjum fundi lesi 2-4 aðilar, sem ákveðnir eru á
fundinum á undan, sjálfvalið efni. Það má vera kafli úr skáldsögu, smásaga, fræðigrein úr bók eða
tímariti, nokkur ljóð eða hvaðeina sem viðkomandi finnst áhugavert. Jafnframt þarf viðkomandi að
kynna höfund, kynna bókina eða fjalla aðeins um efnið. Eftir hvern lestur verði boðið upp á
umræður. Þetta býður upp á fjölbreytni og ef til vill hvatningu til að kynna sér eitthvað sem annars
hefið ekki þótt áhugavert. Einnig verði að hausti valin ein bók sem allir lesi yfir „önnina“ og verði hún
tekin til umræðu undir lok „annarinnar“. Sama gert að vori. Auðvitað koma svo aðrar hugmyndir til
greina.
Við sjáum að á dagskrá FEBH er laus tími í Þorlákssetri á föstudagsmorgnum og gætum við þá verið
þar kl. 10:30-12. Viljum við prófa þann tíma, hann er betri en tíminn sem við höfðum síðast.
Það væri gott ef þeir sem áhuga hafa hefðu samband við mig (hlifarndal@gmail.com, s. 691-8367).
Við ætlum að byrja föstudagsmorguninn 4. nóvember kl. 10:30 og er öllum áhugasömum frjálst að
koma og vera með, hvort sem þeir eru búnir að hafa samband eða ekki. Til að byrja með verðum við í
innri salnum, en ef fjölmenni verður færum við okkur yfir í stærri salinn.
Með bestu kveðju,
Hlíf S. Arndal, fyrir hönd hópsins.